Ձեր վստահելի աղբյուրը

Այս պահին Խոսրովի արգելոցի Խոսրով տեղամաս տանող հատվածում բնապահպան ակտիվիստները փակել են ճանապարհն ու թույլ չեն տալիս լրագրողներով լի ավտոբուսն առաջ շարժվի:

«Դուք իրավունք չունեք ներս գնալ»,-ասում են ակտիվիստներն ու թռնում ավտոբուսի դիմապակուն, լրագրողներին ծախված որակում:

«Գնում եք ուտուշ-խմուշի, ծախված լրագրողներ»,-նման մեղադրանքներ են նրանք հնչեցնում լրագրողների հասցեին:

Հիշեցնենք, որ ՀՀ բնապահպանության նախարար Արամ Հարությունյանի նախաձեռնությամբ այսօր «Խոսրովի Անտառ» պետական արգելոցի «Խոսրովի» տեղամասի այցելուների կենտրոնում նախատեսված էր կազմակերպվել խորհրդակցություն` ոլորտին աջակցող միջազգային կազմակերպությունների, ԳԱԱ ոլորտային ինստիտուտների, բուհերի ներկայացուցիչների հետ:

Բնապահպանության նախարարության նախապես տարածած հաղորդագրության համաձայն, որպես նախաձեռնող կողմ բնապահպանության նախարարությունն առաջարկելու է խորհրդակցության օրակարգում ընդգրկել պահպանվող տարածքների մասին օրենսդրության բարելավման, արգելոցի պահպանման ռեժիմն իրականացնող աշխատակազմի մասնագիտական վերապատրաստման և տեխնիկական վերազինման, ֆինանսական միջոցների համալրման և արդյունավետ օգտագործման, կադրային համալրման, համայնքային իրազեկման, անվտանգ էկոտուրիզմի զարգացման հետ կապված հարցեր:

Օրակարգային են նաև «Խոսրովի անտառ» պետական արգելոց մուտքի էլեկտրոնային թույլտվություններ ստանալու կարգի մշակման, «Խոսրովի անտառ»-ի վարչական սահմաններին տեսախցիկների տեղադրման և էկոպարեկային խմբերի ստեղծման աշխատանքների կարգի մշակման և այլ հարցեր:

Խորհրդակցությունը լուսաբանելու համար «Խոսրով» են մեկնել նաև Panorama.am-ի լրագրողն ու լուսանկարիչը: